午飯時，友人為我帶來一件砵仔糕，因為公司附近那家賣懷舊小食的店，快將又因為業主加租而結業。
想起今早係 Facebook 睇到另一友人 share 的某人的 status cap圖，內容大約係佢同地產經紀講話佢唔想租層樓畀大陸人。當中一段話：「…我唔想街店賣雞煲，你xx酸辣粉，北京餃子，趕絕廣東雲吞麵、粥店…明唔明白？」
係喎，好多人，包括我都知因為租金問題，好多小店都做唔住而結業，但好似無乜特別留意，好多小店，尤其食肆都係地道食品，而愈開愈多的（即使都係小店）係賣外省菜。
上星期十三座牛雜結業；附近的利強記雞蛋仔又話就快執笠。早前生病想簡簡單單食個粥做午餐，卻又因選擇貧瘠被迫要光顧華麗麗米芝蓮店。
我懷念小時候住屋邨的日子……
樓下樓梯口有個婆婆每晚煲一大煲桑寄生湯水售賣；周末黃昏時段開始的車仔檔派對；可遇不可求的走鬼檔現炸薄脆版油炸鬼，那是我吃過最好味的油炸鬼；還有親切的士多老闆、老闆娘……
離開屋邨呢，近年結業的老舖小店，相信大家隨口都說得出三數間。我常去的一品齋、利苑粥麵、謝記魚蛋、大隻佬……到底要執到幾時呀？
最近睇新聞話好多舖位因為租金太貴而丟空多時，希望租金會因此回落令小店、地道食肆有機會回歸。
看見街上愈開愈多藥房，就快我們都靠吃藥維生，因為我們居住的地方病了。
祝早日康復
沒有留言:
發佈留言